Click on a word to bring up parses, dictionary entries, and frequency statistics
38. ibi tribuni militum non loco, castris
ante capto, non praemunito vallo quo receptus esset,
-non deorum saltem, si non hominum memores, nec
auspicato nec litato, instruunt aciem diductam in
cornua, ne circumveniri multitudine hostium possent;
[2]
nec tamen aequari frontes poterant cum extenuando infirmam et vix cohaerentem mediam aciem
haberent. paulum erat ab dextera editi loci, quem
subsidiariis' repleri placuit; eaque res ut initium
pavoris ac fugae, sic una salus fugientibus fuit.
[3]
nam
Brennus regulus Gallorum in paucitate hostium
artem maxime timens, ratus ad id captum superiorem
locum ut ubi Galli cum acie legionum recta fronte
concucurrissent subsidia in aversos transversosque
impetum darent,
[4?]
ad subsidiarios signa convertit, si eos
[p. 130]
loco depulisset haud dubius facilem in aequo campi1 tantum superanti multitudini victoriam fore; adeo
non fortuna modo sed ratio etiam cum barbaris
stabat.
[5]
in altera acie nihil simile Romanis, non
apud duces, non apud milites erat. pavor fugaque
occupaverat animos et tanta omnium2 oblivio ut multo maior pars Veios in hostium urbem, cum Tiberis arceret, quam recto itinere Romam ad
coniuges ac liberos fugerent.
[6]
parumper subsidiarios
tutatus est locus; in reliqua acie simul est clamor
proximis ab latere, ultimis ab tergo auditus, ignotum
hostem prius paene quam viderent, non modo non
temptato certamine sed ne clamore quidem reddito,
integri intactique fugerunt;
[7]
nec ulla caedes pugnantium fuit; terga caesa suomet ipsorum certamine
in turba impedientium fugam.
[8]
circa ripam Tiberis,
quo armis abiectis totum sinistrum cornu defugit,
magna strages facta est, multosque imperitos nandi
aut invalidos, graves loricis aliisque tegminibus, hausere gurgites;
[9]
maxima tamen pars incolumis Veios
perfugit, unde non modo praesidii quicquam sed ne
nuntius quidem cladis Romam est missus.
[10]
ab dextro cornu, quod procul a flumine et magis sub monte
steterat, Romam omnes petiere et ne clausis quidem
portis urbis in arcem confugerunt.
[p. 132]
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.