[25]
Gabinium denique si vidissent duumvirum vestri illi unguentarii,
citius agnovissent. erant illi compti capilli et madentes
cincinnorum fimbriae et fluentes purpurissataeque
buccae, dignae Capua, sed illa vetere; nam haec quidem
quae nunc est splendidissimorum hominum, fortissimorum
virorum, optimorum civium mihique amicissimorum multitudine
redundat. quorum Capuae te praetextatum nemo
aspexit qui non gemeret desiderio mei, cuius consilio cum
universam rem publicam, tum illam ipsam urbem meminerant
esse servatam. me inaurata statua donarant, me
patronum unum asciverant, a me se habere vitam, fortunas,
liberos arbitrabantur, me et praesentem contra latrocinium
tuum suis decretis legatisque defenderant et absentem
principe Cn. Pompeio referente et de corpore rei publicae
tuorum scelerum tela revellente revocarant.
This text is part of:
Search the Perseus Catalog for:
Click on a word to bring up parses, dictionary entries, and frequency statistics
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.