Click on a word to bring up parses, dictionary entries, and frequency statistics
32.
Cupitum id Tiberio: ornat Phraaten accingitque
paternum ad fastigium, destinata retinens, consiliis et astu
res externas moliri, arma procul habere. interea cognitis
insidiis Artabanus tardari metu, modo cupidine vindictae
inardescere. et barbaris cunctatio servilis, statim exequi
regium videtur: valuit tamen utilitas, ut Abdum specie
amicitiae vocatum ad epulas lento veneno inligaret, Sinnacen dissimulatione ac donis, simul per negotia moraretur.
et Phraates apud Syriam dum omisso cultu Romano, cui
per tot annos insueverat, instituta Parthorum sumit, patriis
moribus impar morbo absumptus est. sed non Tiberius
omisit incepta: Tiridaten sanguinis eiusdem aemulum
Artabano reciperandaeque Armeniae Hiberum Mithridaten
deligit conciliatque fratri Pharasmani, qui gentile imperium
obtinebat; et cunctis quae apud Orientem parabantur
L. Vitellium praefecit. eo de homine haud sum ignarus
sinistram in urbe famam, pleraque foeda memorari; ceterum
regendis provinciis prisca virtute egit. unde regressus et
formidine G. Caesaris, familiaritate Claudii turpe in servitium mutatus exemplar apud posteros adulatorii dedecoris
habetur, cesseruntque prima postremis, et bona iuventae
senectus flagitiosa oblitteravit.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.