Click on a word to bring up parses, dictionary entries, and frequency statistics
12.
Relatum inde ad patres a Quintiliano tribuno plebei
de libro Sibullae, quem Caninius Gallus quindecimvirum
recipi inter ceteros eiusdem vatis et ea de re senatus consultum postulaverat. quo per discessionem facto misit litteras Caesar, modice tribunum increpans ignarum antiqui
moris ob iuventam. Gallo exprobrabat quod scientiae
caerimoniarumque vetus incerto auctore ante sententiam
collegii, non, ut adsolet, lecto per magistros aestimatoque
carmine, apud infrequentem senatum egisset. simul commonefecit, quia multa vana sub nomine celebri vulgabantur,
sanxisse Augustum quem intra diem ad praetorem urbanum
deferrentur neque habere privatim liceret. quod a maioribus quoque decretum erat post exustum sociali bello Capitolium, quaesitis Samo, Ilio, Erythris, per Africam etiam
ac Siciliam et Italicas colonias carminibus Sibullae, una seu
plures fuere, datoque sacerdotibus negotio quantum humana
ope potuissent vera discernere. igitur tunc quoque notioni
quindecimvirum is liber subicitur.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.