Click on a word to bring up parses, dictionary entries, and frequency statistics
64.
Simul nuntiato regem Artaxian Armeniis a Germanico datum, decrevere patres ut Germanicus atque Drusus
ovantes urbem introirent. structi et arcus circum latera
templi Martis Vltoris cum effigie Caesarum, laetiore Tiberio
quia pacem sapientia firmaverat quam si bellum per acies
confecisset. igitur Rhescuporim quoque, Thraeciae regem,
astu adgreditur. omnem eam nationem Rhoemetalces tenuerat; quo defuncto Augustus partem Thraecum Rhescuporidi fratri eius, partem filio Cotyi permisit. in ea divisione
arva et urbes et vicina Graecis Cotyi, quod incultum ferox
adnexum hostibus, Rhescuporidi cessit: ipsorumque regum
ingenia, illi mite et amoenum, huic atrox avidum et societatis impatiens erat. sed primo subdola concordia egere:
mox Rhescuporis egredi finis, vertere in se Cotyi data et
resistenti vim facere, cunctanter sub Augusto, quem auctorem utriusque regni, si sperneretur, vindicem metuebat.
enimvero audita mutatione principis immittere latronum
globos, excindere castella, causas bello.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.