Click on a word to bring up parses, dictionary entries, and frequency statistics
24.
Ipse exercitusque ut nullis ex proelio damnis ita
per inopiam et labores fatiscebant, carne pecudum propulsare famem adacti; ad hoc penuria aquae, fervida aestas,
longinqua itinera sola ducis patientia mitigabantur, eadem
pluraque gregario milite tolerantis. ventum dehinc in locos
cultos demessaeque segetes, et ex duobus castellis in quae
confugerant Armenii alterum impetu captum; qui primam
vim depulerant, obsidione coguntur. unde in regionem
Tauraunitium transgressus improvisum periculum vitavit.
nam haud procul tentorio eius non ignobilis barbarus cum
telo repertus ordinem insidiarum seque auctorem et socios
per tormenta edidit, convictique et puniti sunt qui specie
amicitiae dolum parabant. nec multo post legati Tigranocerta missi patere moenia adferunt, intentos popularis ad
iussa: simul hospitale donum, coronam auream, tradebant.
accepitque cum honore, nec quicquam urbi detractum quo
promptius obsequium integri retinerent.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.