Click on a word to bring up parses, dictionary entries, and frequency statistics
56.
Et commotus his Avitus: patienda meliorum imperia; id dis quos implorarent placitum, ut arbitrium penes
Romanos maneret quid darent quid adimerent, neque
alios iudices quam se ipsos paterentur. haec in publicum
Ampsivariis respondit, ipsi Boiocalo ob memoriam amicitiae
daturum agros. quod ille ut proditionis pretium aspernatus
addidit 'deesse nobis terra in vitam, in qua moriamur, non
potest': atque ita infensis utrimque animis discessum. illi
Bructeros, Tencteros, ulteriores etiam nationes socias bello
vocabant: Avitus scripto ad Curtilium Manciam superioris
exercitus legatum, ut Rhenum transgressus arma a tergo
ostenderet, ipse legiones in agrum Tencterum induxit,
excidium minitans ni causam suam dissociarent. igitur
absistentibus his pari metu exterriti Bructeri; et ceteris
quoque aliena pericula deserentibus sola Ampsivariorum
gens retro ad Vsipos et Tubantes concessit. quorum terris
exacti cum Chattos, dein Cheruscos petissent, errore longo
hospites, egeni, hostes in alieno quod iuventutis erat caeduntur, imbellis aetas in praedam divisa est.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.