Click on a word to bring up parses, dictionary entries, and frequency statistics
43.
Multa eo anno prodigia evenere. insessum diris
avibus Capitolium, crebris terrae motibus prorutae domus,
ac dum latius metuitur, trepidatione vulgi invalidus quisque
obtriti; frugum quoque egestas et orta ex eo fames in prodigium accipiebatur. nec occulti tantum questus, sed iura
reddentem Claudium circumvasere clamoribus turbidis,
pulsumque in extremam fori partem vi urgebant, donec
militum globo infensos perrupit. quindecim dierum alimenta urbi, non amplius superfuisse constitit, magnaque
deum benignitate et modestia hiemis rebus extremis subventum. at hercule olim Italia legionibus longinquas in
provincias commeatus portabat, nec nunc infecunditate
laboratur, sed Africam potius et Aegyptum exercemus,
navibusque et casibus vita populi Romani permissa est.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.