Click on a word to bring up parses, dictionary entries, and frequency statistics
38.
Vocati posthac patres multa et magnifica super captivitate Carataci disseruere, neque minus id clarum quam
quod Syphacem P. Scipio, Persen L. Paulus, et si qui alii
vinctos reges populo Romano ostendere. censentur Ostorio
triumphi insignia, prosperis ad id rebus eius, mox ambiguis,
sive amoto Carataco, quasi debellatum foret, minus intenta
apud nos militia fuit, sive hostes miseratione tanti regis
acrius ad ultionem exarsere. praefectum castrorum et
legionarias cohortis extruendis apud Siluras praesidiis relictas circumfundunt. ac ni cito nuntiis ex castellis proximis subventum foret copiarum obsidio occidione obcubuis-
sent: praefectus tamen et octo centuriones ac promptissimus
quisque e manipulis cecidere. nec multo post pabulantis
nostros missasque ad subsidium turmas profligant.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.