Click on a word to bring up parses, dictionary entries, and frequency statistics
20.
Iam castra in hostili solo molienti Corbuloni eae
litterae redduntur. ille re subita, quamquam multa simul
offunderentur, metus ex imperatore, contemptio ex barbaris,
ludibrium apud socios, nihil aliud prolocutus quam 'beatos
quondam duces Romanos,' signum receptui dedit. ut tamen
miles otium exueret, inter Mosam Rhenumque trium et
viginti milium spatio fossam perduxit, qua incerta Oceani
vitarentur. insignia tamen triumphi indulsit Caesar, quamvis bellum negavisset.
Nec multo post Curtius Rufus eundem honorem adipiscitur, qui in agro Mattiaco recluserat specus quaerendis venis
argenti; unde tenuis fructus nec in longum fuit: at legionibus cum damno labor, effodere rivos, quaeque in aperto
gravia, humum infra moliri. quis subactus miles, et quia
pluris per provincias similia tolerabantur, componit occultas
litteras nomine exercituum, precantium imperatorem, ut,
quibus permissurus esset exercitus, triumphalia ante tribueret.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.