Click on a word to bring up parses, dictionary entries, and frequency statistics
75.
Nec patrum cognitionibus satiatus iudiciis adsidebat
in cornu tribunalis, ne praetorem curuli depelleret; multaque eo coram adversus ambitum et potentium preces constituta. set dum veritati consulitur, libertas corrumpebatur.
inter quae Pius Aurelius senator questus mole publicae viae
ductuque aquarum labefactas aedis suas, auxilium patrum
invocabat. resistentibus aerarii praetoribus subvenit Caesar
pretiumque aedium Aurelio tribuit, erogandae per honesta
pecuniae cupiens, quam virtutem diu retinuit, cum ceteras
exueret. Propertio Celeri praetorio, veniam ordinis ob
paupertatem petenti, decies sestertium largitus est, satis
conperto paternas ei angustias esse. temptantis eadem alios
probare causam senatui iussit, cupidine severitatis in iis
etiam quae rite faceret acerbus. unde ceteri silentium et
paupertatem confessioni et beneficio praeposuere.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.