Click on a word to bring up parses, dictionary entries, and frequency statistics
1.
Eiusdem anni principio Caesar Titus, perdomandae
Iudaeae delectus a patre et privatis utriusque rebus militia
clarus, maiore tum vi famaque agebat, certantibus provinciarum et exercituum studiis. atque ipse, ut super fortunam
crederetur, decorum se promptumque in armis ostendebat,
comitate et adloquiis officia provocans ac plerumque in
opere, in agmine gregario militi mixtus, incorrupto ducis
honore. tres eum in Iudaea legiones, quinta et decima et
quinta decima, vetus Vespasiani miles, excepere. addidit e
Syria duodecimam et adductos Alexandria duoetvicensimanos tertianosque; comitabantur viginti sociae cohortes, octo
equitum alae, simul Agrippa Sohaemusque reges et auxilia
regis Antiochi validaque et solito inter accolas odio infensa
Iudaeis Arabum manus, multi quos urbe atque Italia sua
quemque spes acciverat occupandi principem adhuc vacuum.
his cum copiis finis hostium ingressus composito agmine,
cuncta explorans paratusque decernere, haud procul Hierosolymis castra facit.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.