This text is part of:
Search the Perseus Catalog for:
Table of Contents:
Click on a word to bring up parses, dictionary entries, and frequency statistics
[69]
eo scrupulo liberata cum a principibus
uiris in matrimonium peteretur, decreuit sibi diutius in
uiduitate non permanendum; quippe ut solitudinis taedium perpeti posset, tamen aegritudinem corporis ferre
non poterat. mulier sancte pudica, tot annis uiduitatis
sine culpa, sine fabula, assuetudine coniugis torpens et
diutino situ uiscerum saucia, uitiatis intimis uteri saepe
ad extremum uitae discrimen doloribus obortis exanimabatur. medici cum obstetricibus consentiebant penuria
matrimonii morbum quaesitum, malum in dies augeri, aegritudinem ingrauescere; dum aetatis aliquid supersit, nubtiis ualitudinem medicandum. consilium istud cum alii [p. 77]
approbant, tum maxime Aemilianus iste, qui paulo prius
confidentissimo mendacio adseuerabat numquam de nubtiis
Pudentillam cogitasse, priusquam foret magicis maleficiis
a me coacta, me solum repertum, qui uiduitatis eius uelut
quandam uirginitatem carminibus et uenenis uiolarem.
saepe audiui non de nihilo dici mendacem memorem esse
oportere; at tibi, Aemiliane, non uenit in mentem, priusquam ego Oeam uenirem, te litteras etiam, uti nuberet,
scribsisse ad filium eius Pontianum, qui tum adultus
Romae agebat. cedo tu epistolam uel potius da ipsi:
legat, sua sibi uoce suisque uerbis sese reuincat.
Estne haec tua epistola? quid palluisti? nam erubescere tu quidem non potes. estne tua ista subscribtio?—
recita quaeso clarius, ut omnes intellegant, quantum
lingua eius manu discrepet, quantumque minor illis sit
mecum quam secum dissensio.—
Apuleius. Apulei Platonici Madaurensis, Pro se de magia liber (Apologia). Rudolf Helm. Lipsiae : B.G. Teubneri. 1912. Keyboarding.
The Mellon Foundation provided support for entering this text.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.