This text is part of:
Search the Perseus Catalog for:
Click on a word to bring up parses, dictionary entries, and frequency statistics
[91]
Video Gitona cum linteis et strigilibus parieti
applicitum tristem confusumque. Scires, non libenter servire. Itaque ut experimentum
oculorum caperem convertit ille solutum gaudio vultum et “Miserere”
inquit “frater. Ubi arma non sunt, libere loquor. Eripe me latroni cruento et
qualibet saevitia paenitentiam iudicis tui puni. Satis magnum erit misero
solacium, tua voluntate cecidisse.” Supprimere ego querellam iubeo, ne
quis consilia deprehenderet, relictoque Eumolpo—nam in balneo carmen
recitabat— per tenebrosum et sordidum egressum extraho Gitona raptimque in
hospitium meum pervolo Praeclusis[p. 182] deinde foribus invado pectus
amplexibus et perfusum os lacrimis vultu meo contero. Diu vocem neuter invenit; nam
puer etiam singultibus crebris amabile pectus quassaverat. O facinus
“inquam” indignum, “quod amo te quamvis relictus, et in hoc pectore, cum
vulnus ingens fuerit, cicatrix non est. Quid dicis, peregrini amoris concessio?
Dignus hac iniuria fui?” Postquam se amari sensit, supercilium altius sustulit.
“Nec amoris arbitrium ad alium iudicem detuli.1 Sed
nillil iam queror, nihil iam memini, si bona fide paenitentiam emendas.”
Haec cum inter gemitus lacrimasque fudissem, detersit ille pallio vultum et
“Quaeso” inquit “Encolpi, fidem memoriae tuae appello: ego te
reliqui, an tu me prodidisti? Equidem fateor et prae me fero: cum duos armatos
viderem, ad fortiorem confugi.” Exosculatus pectus sapientia plenum
inieci cervicibus manus, et ut facile intellegeret redisse me in gratiam et optima
fide reviviscentem amicitiam, toto pectore adstrinxi.
1 detuli Buecheler: tuli and tulit.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.