This text is part of:
Search the Perseus Catalog for:
Click on a word to bring up parses, dictionary entries, and frequency statistics
[67]
“Quomodo nosti” inquit “illam” Trimalchio “nisi
argentum composuerit, nisi reliquias pueris diviserit, aquam in os suum non
coniciet.”
“Atqui” respondit Habinnas “nisi illa discumbit, ego me
apoculo” et coeperat surgere, nisi signo dato Fortunata quater amplius a tota
familia esset vocata. Venit ergo galbino succincta cingillo, ita ut infra cerasina
appareret tunica et periscelides tortae phaecasiaeque inauratae. Tune sudario manus
tergens, quod in collo habebat, applicat se illi toro, in quo Scintilla Habinnae
discumbebat uxor, osculataque plaudentem “est te” inquit
“videre?”
Eo deinde perventum est, ut Fortunata armillas suas crassissimis detraheret lacertis
Scintillaeque miranti ostenderet. Ultimo etiam periscelides resolvit[p. 128]
et reticulum aureum, quem ex obrussa esse dicebat. Notavit haec Trimalchio iussitque
afferri omnia et “Videtis” inquit “mulieris compedes: sic nos
barcalae despoliamur. Sex pondo et selibram debet habere. Et ipse nihilo minus
habeo decem pondo armillam ex millesimis Mercurii factam.” Ultimo etiam,
ne mentiri videretur, stateram iussit afferri et circumlatum approbari pondus. Nec
melior Scintilla, quae de cervice sua capsellam detraxit aureolam, quam Felicionem
appellabat. Inde duo crotalia protulit et Fortunatae in vicem consideranda dedit et
“Domini” inquit “mei beneficio nemo habet meliora.”
“Quid?” inquit Habinnas “excatarissasti me, ut tibi emerem fabam
vitream. Plane si filiam haberem, auriculas illi praeciderem. Mulieres si non
essent, omnia pro luto haberemus; nunc hoc est caldum meiere et frigidum
potare.”
Interim mulieres sauciae inter se riserunt ebriaeque iunxerunt oscula, dum altera
diligentiam matris familiae iactat, altera delicias et indiligentiam viri. Dumque
sic cohaerent, Habinnas furtim consurrexit pedesque Fortunatae correptos super
lectum immisit.“Au au” illa proclamavit aberrante tunica super genua.
Composita ergo in gremio Scintillae incensissimam1 rubore faciem sudario
abscondit.
1 incensissimam Reinesius; indecens imam.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.