This text is part of:
Search the Perseus Catalog for:
Click on a word to bring up parses, dictionary entries, and frequency statistics
[41]
Interim ego, qui privatum habebam secessum, in
multas cogitationes deductus sum, quare aper pilleatus intrasset. Postquam itaque
omnis bacalusias consumpsi,[p. 66] duravi interrogare illum interpretem
meum, quod1 me torqueret.
At ille: “Plane etiam hoc servus tuus indicare potest; non enim aenigma est,
sed res aperta. Hic aper, cum heri summa cena eum2 vindicasset, a convivis
dimissus est; itaque hodie tanquam libertus in convivium revertitur.”
Damnavi ego stuporem meum et nihil amplius interrogavi, ne viderer nunquam inter
honestos cenasse.
Dum haec loquimur, puer speciosus, vitibus hederisque redimitus, modo Bromium,
interdum Lyaeum Euhiumque confessus, calathisco uvas circumtulit et poemata domini
sui acutissima voce traduxit. Ad quem sonum conversus Trimalchio
“Dionyse” inquit “liber esto.” Puer detraxit pilleum apro
capitique suo imposuit. Tum Trimalchio rursus adiecit: “Non negabitis
me” inquit “habere Liberum patrem.” Laudavimus dictum
Trimalchionis et circumeuntem puerum sane perbasiamus.
Ab hoc ferculo Trimalchio ad lasanum surrexit. Nos libertatem sine tyranno nacti
coepimus invitare convivarum sermones. Dama3 itaque primus cum pataracina poposcisset,
“Diei” inquit “nihil est. Dum versas te, nox fit. Itaque
nihil est melius, quam de cubiculo recta in triclinium ire. Et mundum frigus
habuimus. Vix me balneus calfecit. Tamen calda potio vestiarius est. Staminatas
duxi, et plane matus sum. Vinus mihi in cerebrum abiit.”
[p. 68]
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.