Click on a word to bring up parses, dictionary entries, and frequency statistics
58. primum ingressi sunt pacato agmine.
digressu1 deinde Cottonis et Antigoni et haud multo
post fama mortis Philippi neque Thraces commercio
faciles erant, neque2 Bastarnae empto contenti3 esse poterant aut in agmine contineri ne decederent via.
[2]
inde iniuriae ultro citroque fieri, quarum in dies incremento bellum exarsit. postremo Thraces cum
vim ac multitudinem sustinere hostium non possent,
relictis campestribus vicis in montem ingentis altitudinis—Donucam vocant—concesserunt. quo cum
subire4 Bastarnae vellent,
[3?]
quali tempestate Gallos spoliantes Delphos fama est peremptos esse, talis tum Bastarnas nequiquam ad iuga montium [p. 176]
appropinquantes oppressit.
[4]
neque enim imbre tantum effuso,5 dein creberrima grandine obruti sunt cum ingenti fragore caeli tonitribusque et fulguribus praestringentibus aciem oculorum,
[5?]
sed fulmina etiam sic undique micabant ut peti viderentur corpora, nec solum milites sed etiam principes icti caderent.
[6]
itaque cum praecipiti fuga per rupes praealtas
improvidi sternerentur ruerentque, instabant quidem
perculsis Thraces, sed ipsi deos auctores fugae esse
caelumque in se ruere aiebant.
[7]
dissipati procella
cum6 tamquam ex naufragio plerique7 semermes in castra, unde profecti erant, redissent, consultari quid agerent coeptum. inde orta dissensio, aliis redeundum aliis penetrandum in Dardaniam censentibus;
[8]
triginta ferme milia hominum Clondico duce quo8 profecti erant pervenerunt, cetera multitudo retro qua venerat Apolloniam Mesembriamque9 repetit. Perseus potitus regno interfici Antigonum iussit; et dum firmaret res, legatos Romam ad amicitiam paternam renovandam petendumque ut rex ab senatu appellaretur misit. haec eo anno in Macedonia gesta.
1 primum ingressi sunt pacato agmine. digressu Madvig: digressi sunt pacato agro Mog.
2 neque frob. 31: om. Mog.
3 empto contenti frob. 31: evito contentio Mog.
4 cum subire Weissenborn: ubi ire Mog.
5 A.U.C. 575
6 procella cum frob. 31: procellarum Mog.
7 plerique frob. 31: proeliique se Mog.
8 quo Madvig: om. Mog.
9 Mesembriamque Heraeus: meridianam Mog.
Livy. Books XL-XLII With An English Translation. Cambridge. Cambridge, Mass., Harvard University Press; London, William Heinemann, Ltd. 1938: published without copyright notice.
The Annenberg CPB/Project provided support for entering this text.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.