Click on a word to bring up parses, dictionary entries, and frequency statistics
30.
magnum bellum ea aestate coortum in Hispania citeriore. ad quinque et triginta milia hominum,
quantum numquam ferme antea, Celtiberi comparaverant.
[2]
Q. Fulvius Flaccus eam obtinebat provinciam.
is quia armare iuventutem Celtiberos audierat, et ipse
quanta poterat a sociis auxilia contraxerat, sed nequaquam numero militum hostem aequabat.
[3]
principio veris
exercitum in Carpetaniam duxit, et castra locavit ad
oppidum Aeburam, modico praesidio in urbe posito.
[4]
paucis post diebus Celtiberi milia duo fere inde sub
colle posuerunt castra. quos ubi adesse praetor Romanus sensit, M. Fulvium fratrem cum duabus turmis
sociorum equitum ad castra hostium speculatum misit,
quam proxime succedere ad vallum iussum, ut viseret,
quanta essent;
[5]
pugna abstineret, reciperetque sese, si
hostium equitatum exeuntem vidisset. ita ut praeceptum erat fecit. per dies aliquot nihil ultra motum,
quam ut hae duae turmae ostenderentur, deinde subducerentur, ubi equitatus hostium castris procucurrisset.
postremo Celtiberi,
[6]
simul omnibus copiis peditum equitumque castris egressi, acie derecta medio fere spatio
inter bina castra constiterunt.
[7]
campus erat planus omnis et aptus pugnae. ibi stetere Hispani hostes exspectantes. Romanus suos intra vallum continuit. per
quadriduum continuum et illi eodem loco aciem instructam tenuerunt et ab Romanis nihil motum.
[8]
inde
[p. 87]
quievere in castris Celtiberi, quia pugnae copia non
fiebat: equites tantum in stationem egrediebantur, ut
parati essent, si quid ab hoste moveretur.
[9]
pone castra
utrique pabulatum et lignatum ibant, neutri alteros
impedientes.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.