Titus Livius (Livy), The History of Rome, Book 38
Evan T. Sage, Ph.D., Ed.

6. tribus locis, sicut ante dictum est, ad Pyrrheum opera Romana erant, quae omnia simul, sed nec apparatu nec vi simili, [2?] Aetoli aggressi sunt: alii cum ardentibus facibus, alii stuppam picemque et malleolos ferentes, tota collucente flammis acie, advenere. [3] multos primo impetu custodes oppresserunt; dein, postquam clamor tumultusque in castra est perlatus datumque a consule signum, arma capiunt et omnibus portis ad opem ferendam effunduntur. [4] ferro ignique gesta res; ab duobus irrito incepto, cum temptassent magis quam inissent certamen, Aetoli abscesserunt; atrox pugna¹ in unum inclinaverat locum. [5] ibi diversis partibus duo duces Eupolemus et Nicodamus pugnantes hortabantur et prope certa fovebant spe iam Nicandrum ex composito adfore et terga hostium invasurum. [6] haec res aliquamdiu animos pugnantium sustinuit; ceterum, postquam nullum ex composite signum a suis accipiebant et crescere numerum hostium cernebant, destituti² segnius instare; [7] postremo re omissa iam vix tuto receptu fugientes in urbem compelluntur, [p. 20] parte operum incensa et pluribus aliquanto, quam ab³ ipsis⁴ ceciderant, interfectis. quodsi ex composito acta res fuisset, haud dubium erat expugnari una utique parte opera cum magna caede hostium potuisse. [8] Ambracienses quique intus erant Aetoli non ab eius solum noctis incepto recessere, sed in reliquum quoque tempus velut proditi ab suis segniores ad pericula erant. [9] iam nemo eruptionibus, ut ante, in stationes hostium, sed dispositi per muros et turres ex tuto pugnabant.