Titus Livius (Livy), The History of Rome, Book 37
Evan T. Sage, PhD professor of latin and head of the department of classics in the University of Pittsburgh, Ed.

16. C. Livius cum duabus quinqueremibus Romanis et quattuor quadriremibus Rhodiis et duabus apertis Zmyrnaeis in Lyciam est missus, Rhodum prius iussus adire et omnia cum iis communicare consilia. [2] civitates, quas praetervectus est, Miletus Myndus Halicarnassus Cnidus Cous, imperata enixe fecerunt. [3] Rhodum ut ventum est, simul et ad quam rem missus esset, iis exposuit et consuluit eos. approbantibus cunctis et ad eam quam habebat classem, adsumptis tribus quadriremibus, navigat Patara. [4] primo secundus ventus ad ipsam urbem ferebat eos, sperabantque subito terrore aliquid moturos; postquam circumagente se vento fluctibus dubiis volvi coeptum est mare, pervicerunt [p. 336] quidem remis, ut tenerent terram; [5] sed neque¹ circa urbem tuta statio erat, nec ante ostium portus in salo stare poterant aspero mari² et nocte imminente. [6] praetervecti moenia portum Phoenicunta, minus duum milium spatio inde distantem, petiere, navibus a maritima vi tutum; [7] sed altae³ insuper imminebant rupes, quas celeriter oppidani adsumptis regiis⁴ militibus, quos in praesidio habebant, ceperunt. [8] adversus quos Livius, quamquam erant iniqua ac difficilia ad exitus loca, Issaeos auxiliares et Zmyrnaeorum expedites iuvenes misit. [9] hi, dum missilibus primo et adversus paucos levibus excursionibus⁵ lacessebatur magis quam conserebatur pugna, sustinuerunt certamen; [10] postquam plures ex urbe adfluebant, et iam omnis multitudo effundebatur, timor incessit Livium⁶ ne et auxiliares circumvenirentur et navibus etiam ab terra periculum esset. [11] ita non milites solum sed etiam navales socios, remigum turbam, quibus quisque poterat telis, armatos in proelium eduxit. [12] tum quoque anceps pugna fuit, neque⁷ milites solum aliquot, sed L. Apustius tumultuario proelio cecidit; postremo tamen fusi fugatique sunt Lycii atque in urbem compulsi, et Romani cum haud incruenta victoria ad naves redierunt. [13] inde in Telmessicum profecti sinum, qui latere uno Cariam altero Lyciam contingit, omisso [p. 338] consilio Patara amplius temptandi⁸ Rhodii domum⁹ dimissi sunt, [14?] Livius praetervectus Asiam in Graeciam transmisit, ut conventis Scipionibus, qui tum circa Thessaliam erant, in Italiam traiceret.