Titus Livius (Livy), The History of Rome, Book 35
Evan T. Sage, PhD professor of latin and head of the department of classics in the University of Pittsburgh, Ed.

23. ceterum eo tempore minus ea bella quae gerebantur curae patribus erant quam expectatio nondum coepti cum Antiocho belli. [2] nam etsi¹ per legatos identidem omnia explorabantur,² tamen³ rumores temere sine ullis auctoribus orti multa falsa veris miscebant. [3] inter quae adlatum erat, cum in Aetoliam venisset Antiochus, extemplo classem eum in Siciliam missurum. [4] itaque senatus, etsi praetorem Atilium cum classe miserat in Graeciam, tamen, [5?] quia non copiis modo sed etiam auctoritate opus erat ad tenendos⁴ sociorum animos, T. Quinctium et Cn. Octavium et Cn. Servilium et P. Villium legatos in Graeciam misit et, ut M. Baebius ex [p. 66] Bruttis ad Tarentum et Brundisium promoveret⁵ legiones, decrevit, inde, si res posceret, in Macedoniam traiceret, [6?] et ut M. Fulvius praetor classem navium viginti mitteret ad tuendam Siciliae oram, et ut⁶ cum imperio esset, [7?] qui classem eam duceret—duxit L. Oppius Salinator, qui priore anno aedilis plebei fuerat—et [8?] ut idem praetor L. Valerio collegae scriberet periculum esse ne classis regis Antiochi ex Aetolia in Siciliam traiceret: itaque placere senatui ad eum exercitum quem haberet tumultuariorum militum ad duodecim milia et quadringentos equites scriberet, quibus oram maritimam provinciae, qua vergeret in Graeciam, tueri posset. [9] eum dilectum praetor non ex Sicilia ipsa tantum sed ex circumiacentibus insulis habuit, oppidaque omnia maritima, quae in Graeciam versa erant, praesidiis firmavit. [10] addidit alimenta rumoribus⁷ adventus Attali, Eumenis fratris, qui nuntiavit,. Antiochum regem Hellespontum cum exercitu transisse, et Aetolos ita se parare, ut sub adventum eius in armis essent. [11] et Eumeni absenti et praesenti Attalo gratiae actae, et aedes liberae locus lautia decreta, et munera data, equi duo, bina equestria arma et vasa argentea centum pondo et aurea viginti pondo.