Click on a word to bring up parses, dictionary entries, and frequency statistics
5. anno quingentesimo quinquagesimo1 primo2 3 ab urbe condita, P. Sulpicio Galba C. Aurelio consulibus, bellum cum rege Philippo initum est, paucis mensibus post pacem Carthaginiensibus datam.
[2]
omnium primum eam rem idibus Martiis, quo die
tum consulatus inibatur,
[3?]
P. Sulpicius consul rettulit
senatusque decrevit, uti consules maioribus hostiis
rem divinam facerent quibus diis ipsis4 videretur cum precatione ea:
[4]
“quod senatus populusque Romanus de re publica deque ineundo novo bello in animo haberet, ea res uti populo Romano sociisque ac nomini Latino bene ac feliciter eveniret;” secundum rem divinam precationemque ut de re publica
deque provinciis senatum consulerent.
[5]
per eos dies
[p. 16]
opportune irritandis ad bellum animis et litterae ab5 M. Aurelio legato et M. Valerio Laevino propraetore adlatae et Atheniensium nova legatio venit,
[6?]
quae regem appropinquare finibus suis nuntiaret, brevique non agros modo sed urbem etiam in dicione eius futuram nisi quid in Romanis auxilii foret.
[7]
cum
renuntiassent consules rem divinam rite peractam
esse et precationi annuisse deos haruspices respondere
laetaque exta fuisse et prolationem finium victoriamque et triumphum portendi, tum litterae
Valerii Aureliique lectae et legati Atheniensium
auditi.
[8]
senatus inde consultum factum est, ut sociis
gratiae agerentur, quod diu sollicitati ne obsidionis
quidem metu fide decessissent;
[9]
de auxilio mittendo
tum responderi placere cum consules provincias
sortiti essent atque is consul cui Macedonia provincia evenisset ad populum tulisset, ut Philippo,
regi Macedonum, indiceretur bellum.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.