Click on a word to bring up parses, dictionary entries, and frequency statistics
5. multi per eos dies motus multique impetus hinc
atque illinc facti, quia superante multitudine hostes
carpere multifariam viris Romanas, ut non suffecturas
ad omnia, adgressi sunt;
[2]
simul castra oppugnabantur,
simul pars exercitus ad populandum agrum Romanum
missa urbemque ipsam, si qua fortuna daret, temptandam.
[3]
L. Valerius ad praesidium urbis relictus, consul
Postumius ad arcendas populationes finium missus.
nihil remissum ab ulla parte curae aut laboris;
[4]
vigiliae
in urbe, stationes ante portas praesidiaque in muris
disposita et, quod necesse erat in tanto tumultu, iustitium per aliquot dies servatum.
[5]
interim in castris Furius consul cum primo quietus obsidionem passus esset, in incautum hostem decumana porta erupit et, cum persequi posset, metu
substitit, ne qua ex parte altera in castra vis fieret.
Furium legatum—
[6]
frater idem consulis erat—longius
extulit cursus; nec suos ille redeuntes persequendi
studio neque hostium ab tergo incursum vidit. ita
exclusus multis saepe frustra conatibus captis, ut viam
sibi ad castra faceret, acriter dimicans cecidit, et consul nuntio circumventi fratris conversus ad pugnam,
[7]
dum se temere magis quam satis caute in mediam
dimicationem infert, vulnere accepto aegre ab circumstantibus ereptus et suorum animos turbavit et ferociores hostes fecit;
[8]
qui caede legati et consulis vulnere
accensi nulla deinde vi sustineri potuere, cum conpulsi
in castra Romani rursus obsiderentur nec spe nec
viribus pares, venissetque in periculum summa rerum,
ni T. Quinctius peregrinis copiis, Latino Hernicoque
exercitu, subvenisset.
[9]
is intentos in castra Romana
Aequos legatique caput ferociter ostentantes ab tergo
[p. 144]
adortus, simul ad signum a se procul editum ex castris
eruptione facta, magnam vim hostium circumvenit.
minor caedis,
[10]
fuga effusior Aequorum in agro fuit Romano; in quos palatos praedam agentes Postumius
aliquot locis, quibus opportuna inposuerat praesidia,
impetum dedit. hi vagi dissipato agmine fugientes in
Quinctium victorem cum saucio consule revertentem
incidere.
[11]
tum consularis exercitus egregia pugna consulis vulnus, legati et cohortium ultus est caedem.
magnae clades ultro citroque illis diebus et inlatae et
acceptae.
[12]
difficile ad fidem est in tam antiqua re,
quot pugnaverint ceciderintve, exacto adfirmare numero; audet tamen Antias Valerius concipere summas:
[13]
Romanorum cecidisse in Hernico agro quinque milia
octingentos, ex praedatoribus Aequorum, qui populabundi in finibus Romanis vagabantur, ab A. Postumio
consule duo milia et quadringentos caesos; ceteram
multitudinem praedam agentem, quae inciderit in Quinctium, nequaquam pari defunctam esse caede; interfecta
inde quattuor milia et exequendo subtiliter numerum
ducentos ait et triginta.
ut Romam reditum est, iustitium remissum est.
[14]
caelum visum est ardere plurimo igni, portentaque
alia aut obversata oculis aut vanas exterritis ostentavere species. his avertendis terroribus in triduum feriae indictae, per quas omnia delubra pacem deum exposcentium virorum mulierumque turba inplebantur.
[15]
cohortes inde Latinae Hernicaeque ab senatu gratiis
ob inpigram militiam actis remissae domos. Antiates
mille milites, quia serum auxilium post proelium venerant, prope cum ignominia dimissi.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.