Click on a word to bring up parses, dictionary entries, and frequency statistics
19.
Hispaniae sicut a bello Punico quietae
erant, ita quasdam civitates propter conscientiam culpae metu magis quam fide quietas esse apparebat,
quarum maxume insignes et magnitudine et noxa
Iliturgi et Castulo erant.
[2]
Castulo cum prosperis rebus
socii fuissent, post caesos cum exercitibus Scipiones
defecerat ad Poenos; Iliturgitani prodendis, qui ex
illa clade ad eos perfugerant, interficiendisque scelus
etiam defectioni addiderant.
[3]
in eos populos primo adventu, cum dubiae Hispaniae essent, merito magis
quam utiliter saevitum foret;
[4]
tunc iam tranquillis
rebus quia tempus expetendae poenae videbatur venisse,
accitum ab Tarracone L. Marcium cum tertia parte
copiarum ad Castulonem oppugnandum mittit; ipse
cum cetero exercitu quintis fere ad Iliturgin castris
pervenit.
[5]
clausae erant portae omniaque instructa et
parata ad oppugnationem arcendam; adeo conscientia,
quid se meritos scirent, pro indicto eis bello fuerat.
hinc et hortari milites Scipio orsus est:
[6]
ipsos claudendo portas indicasse Hispanos, quid ut timerent
meriti essent. itaque multo infestioribus animis cum
eis quam cum Carthaginiensibus bellum gerendum
esse;
[7]
quippe cum illis prope sine ira de imperio et
gloria certari, ab his perfidiae et crudelitatis et sceleris
[p. 446]
poenas expetendas esse.
[8]
venisse tempus, quo et
nefandam commilitonum necem et in semet ipsos, si
eodem fuga delati forent, instructam fraudem ulciscerentur, et in omne tempus gravi documento sancirent, ne quis umquam Romanum civem militemve in
ulla fortuna opportunum iniuriae duceret.
[9]
ab hac cohortatione ducis incitati scalas electis per manipulos
viris dividunt; partitoque exercitu ita, ut parti alteri
Laelius praeesset legatus, duobus simul locis ancipiti
terrore urbem adgrediuntur.
[10]
non dux unus aut plures
principes oppidanos, sed suus ipsorum ex conscientia
culpae metus ad defendendam inpigre urbem hortatur;
et meminerant
[11]
et admonebant alii alios supplicium
ex se, non victoriam peti; ubi quisque mortem oppeteret, id referre, utrum in pugna et in acie, ubi Mars
communis et victum saepe erigeret et adfligeret victorem,
[12]
an postmodo, cremata et diruta urbe, ante ora
captarum coniugum liberorumque, inter verbera et
vincula, omnia foeda atque indigna passi exspirarent.
[13]
igitur non militaris modo aetas aut viri tantum sed
feminae puerique supra animi corporisque vires adsunt,
propugnantibus tela ministrant, saxa in muros munientibus gerunt.
[14]
non libertas solum agebatur, quae
virorum fortium tantum pectora acuit, sed ultima
omnium supplicia et foeda mors ob oculos erat. accendebantur animi et certamine laboris ac periculi
atque ipso inter se conspectu.
[15]
itaque tanto ardore
certamen initum est, ut domitor ille totius Hispaniae
exercitus ab unius oppidi iuventute saepe repulsus a
muris haud satis decoro proelio trepidarit.
[16]
id ubi vidit
Scipio, veritus, ne vanis tot conatibus suorum et
hostibus cresceret animus et segnior miles fieret,
sibimet conandum ac partem periculi capessendam
esse ratus, increpita ignavia militum ferri scalas iubet
et se ipsum, si ceteri cunctentur, escensurum minatur.
[17]
iam subierat haud mediocri periculo moenia cum
clamor undique ab sollicitis vicem imperatoris militibus
[p. 447]
sublatus scalaeque multis simul partibus erigi
coeptae;
[18]
et ex altera parte Laelius institit. tum victa
oppidanorum vis, deiectisque propugnatoribus occupantur muri; arx etiam ab ea parte, qua inexpugnabilis videbatur, inter tumultum capta est.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.