Click on a word to bring up parses, dictionary entries, and frequency statistics
32. consul alter de postulatis Siculorum ad
patres rettulit. ibi cum diu sententiis certatum
esset, et magna pars senatus, principe eius sententiae
T. Manlio Torquato,
[2]
cum tyrannis bellum gerendum
fuisse censerent, hostibus et Syracusanorum et
populi Romani, et urbem recipi, non capi, et receptam
legibus antiquis et libertate stabiliri, non fessam
miseranda servitute bello adfligi;
[3]
inter tyrannorum
et ducis Romani certamina praemium victoris in
medio positam urbem pulcherrimam ac nobilissimam
perisse, horreum atque aerarium quondam populi
Romani, cuius munificentia ac donis multis tempestatibus, hoc denique ipso Punico bello adiuta ornataque
res publica esset.
[4]
si ab inferis existat rex Hiero,
fidissimus imperi Romani cultor, quo ore aut Syracusas
aut Romam ei ostendi posse, cum, ubi semirutam ac
spoliatam patriam respexerit, ingrediens Romam
in vestibulo urbis, prope in porta, spolia patriae
suae visurus sit?
[5]
—haec taliaque cum ad invidiam
consulis miserationemque Siculorum dicerentur, mitius tamen decreverunt patres:
[6]
acta M.1 Marcelli
quae is gerens bellum victorque egisset rata habenda
[p. 124]
esse; in relicum curae senatui fore rem Syracusanam,2 mandaturosque consuli Laevino ut, quod3 sine iactura rei publicae fieri posset, fortunis eius civitatis consuleret.
[7]
missis duobus senatoribus in Capitolium ad consulem, uti rediret in curiam, et introductis
Siculis, senatus consultum recitatum est;
[8]
legatique
benigne appellati ac dimissi ad genua se Marcelli
consulis proiecerunt obsecrantes4 ut quae deplorandae ac levandae calamitatis causa dixissent veniam eis daret, et in fidem clientelamque se urbemque Syracusas acciperet. pollicens hoc5 consul clementer appellatos eos dimisit.
1 acta M. Weissenborn: ctam P: tam p2(3): cam M: causam A8JK: causa M6 Aldus, Froben.
2 A.U.C. 544
3 ut, quod Alschefski: vi quod P: quod P2? (1) Gronovius: quoad z.
4 obsecrantes AJK Aldus, Froben: et obsecrantes P(3): orantes et obsecrantes Weissenborn.
5 Pollicens hoc Böttcher: potens oc (for söc or s.c?)P(3): potens senatus consulto Walters: potens sui alschefskci: post haec M8A8JK Aldus, Froben.
Livy. Books XXVI-XXVII With An English Translation. Cambridge. Cambridge, Mass., Harvard University Press; London, William Heinemann, Ltd. 1943: no copyright notice.
The Annenberg CPB/Project provided support for entering this text.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.