Click on a word to bring up parses, dictionary entries, and frequency statistics
2.
eodem anno classis Graecorum Cleonymo duce
Lacedaemonio ad Italiae litora adpulsa Thurias urbem
in Sallentinis cepit.
[2]
adversus hunc hostem consul
Aemilius missus proelio uno fugatum conpulit in
naves. Thuriae redditae veteri cultori, Sallentinoque
agro pax parta.
[3]
Iunium Bubulcum dictatorem missum
in Sallentinos in quibusdam annalibus invenio et
Cleonymum, priusquam confligendum esset cum Romanis, Italia excessisse.
[4]
circumvectus inde Brundisii
promunturium medioque sinu Hadriatico ventis latus,
cum laeva inportuosa Italiae litora, dextra Illyrii Liburnique et Histri, gentes ferae et magna ex parte
latrociniis maritimis infames, terrerent, penitus ad
litora Venetorum pervenit.
[5]
expositis paucist qui loca
[p. 565]
explorarent, cum audisset tenue praetentum litus esse,
quod transgressis stagna ex adverso sint inrigua aestibus maritimis; agros haud procul proximos campestres
cerni, ulteriora colles videri esse;
[6]
ostium fluminis
praealti, quo circumagi naves in stationem tutam
possent, vidisse—Meduacus amnis erat—: eo invectam classem subire flumine adverso iussit.
[7]
gravissumas navium non pertulit alveus fluminis; in leviora
navigia transgressa multitudo armatorum ad frequentes agros, tribus maritimis Patavinorum vicis colentibus eam oram, pervenit.
[8]
ibi egressi praesidio levi navibus relicto vicos expugnant, inflammant tecta, hominum pecudumque praedas agunt et dulcedine praedandi longius usque a navibus procedunt.
haec ubi Patavium sunt nuntiata—
[9]
semper autem
eos in armis accolae Galli habebant—, in duas partes iuventutem dividunt. altera in regionem, qua
effusa populatio nuntiabatur, altera, ne cui praedonum
obvia fieret, diverso itinere ad stationem navium
milia autem quattuordecim ab oppido aberat—ducta.
in naves paucis custodibus interemptis impetus factus,
[10]
territique nautae coguntur naves in alteram ripam
amnis traicere. et in terra prosperum aeque in palatos praedatores proelium fuerat, refugientibusque ad
stationem Graecis Veneti obsistunt;
[11]
ita in medio circumventi hostes caesique; pars capti classem indicant
regemque Cleonymum tria milia abesse.
[12]
inde captivis
proximo vico in custodiam datis pars fluviatiles naves,
ad superanda vada stagnorum apte planis alveis fabricatas, pars captiva navigia armatis conplent profectique
ad classem immobiles naves et loca ignota plus quam
hostem timentes circumvadunt
[13]
fugientesque in altum
acrius quam repugnantes usque ad ostium amnis persecuti captis quibusdam incensisque navibus hostium,
quas trepidatio in vada intulerat, victores revertuntur.
Cleonymus vix quinta parte navium incolumi,
[14]
nulla
regione maris Hadriatici prospere adita, discessit.
[p. 566]
rostra navium spoliaque Laconum in aede Iunonis veteri fixa multi supersunt qui viderunt Patavii.
[15]
monumentum navalis pugnae eo die, quo pugnatum est,
quotannis sollemne certamen navium in flumine oppidi
medio exercetur.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.