Click on a word to bring up parses, dictionary entries, and frequency statistics
“
[96]
46. Quid? illudne dubium est, quin multi,
cum ita nati essent, ut quaedam contra naturam
depravata haberent, restituerentur et corrigerentur
ab natura, cum se ipsa revocasset, aut arte atque
medicina? ut, quorum linguae sic inhaererent, ut
loqui non possent, eae scalpello resectae liberarentur.
multi etiam naturae vitium meditatione atque
exercitatione sustulerunt, ut Demosthenem scribit
Phalereus, cum rho dicere nequiret, exercitatione
fecisse, ut planissime diceret. quodsi haec astro
ingenerata et tradita essent, nulla res ea mutare
posset. quid? dissimilitudo locorum nonne dissimilis hominum procreationes habet? quas quidem
percurrere oratione facile est, quid inter Indos et
Persas et Aethiopas et Syros differat corporibus,
animis, ut incredibilis varietas dissimilitudoque sit.
”
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.