Click on a word to bring up parses, dictionary entries, and frequency statistics
“
[151]
Iam
vero operibus hominum id est manibus cibi etiam varietas invenitur et copia. nam et agri multa efferunt
manu quaesita, quae vel statim consumantur vel mandentur condita vetustati, et praeterea vescimur bestiis
et terrenis et aquatilibus et volantibus partim capiendo
partim alendo. Efficimus etiam domitu nostro quadripedum vectiones, quorum celeritas atque vis nobis
ipsis adfert vim et celeritatem. nos onera quibusdam
bestiis nos iuga inponimus; nos elephantorum acutissumis sensibus nos sagacitate canum ad utilitatem nostram abutimur; nos e terrae cavernis ferrum elicimus
rem ad colendos agros necessariam, nos aeris argenti
auri venas penitus abditas invenimus et ad usum aptas
et ad ornatum decoras. Arborum autem confectione
omnique materia et culta et silvestri partim ad calficiendum corpus igni adhibito et ad mitigandum cibum
utimur, partim ad aedificandum, ut tectis saepti frigora
caloresque pellamus;
”
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.