οἱ μὲν πολλοὶ τῶν περὶ τοὺς λόγους, ὦ ἄνδρες Ἕλληνες,
εἰώθασιν ἢ τὰς ἐπὶ τῶν πλασμάτων διατριβὰς προελόμενοι τὸν ἅπαντα χρόνον μελετᾶν λέγειν, τοῦ λέγειν δ᾽ ἀπολείπεσθαι τοσοῦτον ὅσονπερ ἂν εἰ μηδὲν τῶν εἰς τοῦτο
φερόντων ἔπραττον, ἢ τούτων ὑπερφρονήσαντες αὐτοὶ
μηδὲν σπουδαιοτέρῳ τούτων σχολάζειν πράγματι, τῷ περὶ
τὴν ἔριν καὶ τῷ ταράττειν τοὺς εἰς λόγον αὐτοῖς ἀφικνουμένους, ἐξ ὧν λυποῦσι μὲν τοὺς ἐντυγχάνοντας, βελτίους
δὲ οὔτ᾽ αὐτοὶ φαίνονται δήπουθεν οὔτ᾽ ἐκείνους ποιεῖν
ἔχουσιν. ἤδη δέ τις τῶν ἐλλογίμων καὶ τῶν παλαιῶν
σοφιστῶν ἐσεμνύνατο ἐπ᾽ ἀρχῇ τοῦ συγγράμματος ὡς
αὐτός γε τοιοῦτον οὐδὲν ποιήσων οὐδὲ κομψευσόμενος,
ἀλλ᾽ ὑπὲρ δυοῖν τούτοιν διαλεξόμενος, τῆς τε πρὸς ἀλλήλους ὁμονοίας καὶ τοῦ πολέμου τοῦ πρὸς τοὺς βαρβάρους,
καὶ μάλα γενναίαν, ὥς γ᾽ ἐμοὶ κριτῇ, καὶ προσήκουσαν
τῶν λόγων ἐνστησάμενος τὴν ὑπόθεσιν. ἐγὼ δ᾽ ὑπὲρ μὲν
τοῦ πολέμου τοῦ πρὸς τοὺς βαρβάρους οὐκέθ᾽ ὁρῶ καιρὸν λέγειν. ἀθρόαν γὰρ ἁπάντων δεδωκότων δίκην τοῖς τε
θεοῖς καὶ τοῖς ἡγεμόσι μελήσειν οἶμαι, καὶ σὺν αὐτοῖς
γε εἰπεῖν τοῖς θεοῖς οὐ πολὺν τὸν ἀγῶνα νομίζω γενήσεσθαι, ὁρῶν τῆς ἁπάσης οἰκουμένης καὶ τῆς ἤδη βεβαίως [p. 769]
ἐχομένης μικρὸν μέρος τὸ νῦν ὑπ᾽ ἀνοίας ἀνθεστηκὸς,
ὃ δὲ λοιπόν ἐστι, περὶ τῆς πρὸς ἀλλήλους ὁμονοίας οὕτως
ὅπως ἂν οἷός τε ὦ διαλέξομαι. νομίζω γὰρ καὶ τῆς συνεχοῦς ταύτης ἀσχολίας καὶ μελέτης τῆς περὶ τοὺς λόγους
εἰς τὰ τοιαῦτα μάλιστα τῶν ἀγωνισμάτων ἀνήκειν τὴν
χρείαν. οὐ γὰρ ὅπως μηδέποτ᾽ εἴποιμεν τῶν χρησίμων μηδὲν, διὰ τοῦτ᾽ ἀεὶ μελετῶμεν, ἀλλ᾽ ὅστις τὰ δέοντα λέγειν ἔχει τε καὶ θαρρεῖ, οὗτός ἐστιν ὁ καὶ τὴν μελέτην
δεικνὺς ὡς οὐχὶ μάτην οὐδ᾽ εἰκῆ πεποίηται. ἠπιστάμην
μὲν οὖν καὶ τοῦτο ὥσπερ ἔρεισμα πολλοῖς ὂν καὶ
Click on a word to bring up parses, dictionary entries, and frequency statistics
Aristides, Aelius. Aristides. ex recensione Guilielmi Dindorfii. Leipzig. Weidmann. 1829. 1-2.
Google Digital Humanities Awards Program provided support for entering this text.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.