Click on a word to bring up parses, dictionary entries, and frequency statistics
85.
Eodem anno gravibus senatus decretis libido feminarum coercita cautumque ne quaestum corpore faceret
cui avus aut pater aut maritus eques Romanus fuisset. nam
Vistilia praetoria familia genita licentiam stupri apud aedilis
vulgaverat, more inter veteres recepto, qui satis poenarum
adversum impudicas in ipsa professione flagitii credebant.
exactum et a Titidio Labeone Vistiliae marito cur in uxore
delicti manifesta ultionem legis omisisset. atque illo praetendente sexaginta dies ad consultandum datos necdum
praeterisse, satis visum de Vistilia statuere; eaque in insulam Seriphon abdita est. actum et de sacris Aegyptiis
Iudaicisque pellendis factumque patrum consultum ut
quattuor milia libertini generis ea superstitione infecta quis
idonea aetas in insulam Sardiniam veherentur, coercendis
illic latrociniis et, si ob gravitatem caeli interissent, vile
damnum; ceteri cederent Italia nisi certam ante diem
profanos ritus exuissent.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.