Click on a word to bring up parses, dictionary entries, and frequency statistics
83.
Honores ut quis amore in Germanicum aut ingenio
validus reperti decretique: ut nomen eius Saliari carmine
caneretur; sedes curules sacerdotum Augustalium locis
superque eas querceae coronae statuerentur; ludos circensis eburna effigies praeiret neve quis flamen aut augur
in locum Germanici nisi gentis Iuliae crearetur. arcus
additi Romae et apud ripam Rheni et in monte Syriae
Amano cum inscriptione rerum gestarum ac mortem ob
rem publicam obisse. sepulchrum Antiochiae ubi crematus, tribunal Epidaphnae quo in loco vitam finierat.
statuarum locorumve in quis coleretur haud facile quis
numerum inierit. cum censeretur clipeus auro et magni-
tudine insignis inter auctores eloquentiae, adseveravit Tiberius solitum paremque ceteris dicaturum: neque enim
eloquentiam fortuna discerni et satis inlustre si veteres
inter scriptores haberetur. equester ordo cuneum Germanici appellavit qui iuniorum dicebatur, instituitque uti
turmae idibus Iuliis imaginem eius sequerentur. pleraque
manent: quaedam statim omissa sunt aut vetustas oblitteravit.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.