Click on a word to bring up parses, dictionary entries, and frequency statistics
54.
Petita inde Euboea tramisit Lesbum ubi Agrippina
novissimo partu Iuliam edidit. tum extrema Asiae Perinthumque ac Byzantium, Thraecias urbes, mox Propontidis
angustias et os Ponticum intrat, cupidine veteres locos et
fama celebratos noscendi; pariterque provincias internis
certaminibus aut magistratuum iniuriis fessas refovebat. atque illum in regressu sacra Samothracum visere nitentem
obvii aquilones depulere. igitur adito Ilio quaeque ibi
varietate fortunae et nostri origine veneranda, relegit Asiam
adpellitque Colophona ut Clarii Apollinis oraculo uteretur.
non femina illic, ut apud Delphos, sed certis e familiis et
ferme Mileto accitus sacerdos numerum modo consultantium et nomina audit; tum in specum degressus, hausta
fontis arcani aqua, ignarus plerumque litterarum et carminum edit responsa versibus compositis super rebus quas
quis mente concepit. et ferebatur Germanico per ambages,
ut mos oraculis, maturum exitum cecinisse.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.