Click on a word to bring up parses, dictionary entries, and frequency statistics
9.
Interim Corbulo numquam neglectam Euphratis ripam
crebrioribus praesidiis insedit; et ne ponti iniciendo impedimentum hostiles turmae adferrent (iam enim subiectis
campis magna specie volitabant), navis magnitudine praestantis et conexas trabibus ac turribus auctas agit per
amnem catapultisque et ballistis proturbat barbaros, in
quos saxa et hastae longius permeabant quam ut contrario
sagittarum iactu adaequarentur. dein pons continuatus
collesque adversi per socias cohortis, post legionum castris
occupantur, tanta celeritate et ostentatione virium ut Parthi
omisso paratu invadendae Syriae spem omnem in Armeniam
verterent, ubi Paetus imminentium nescius quintam legionem procul in Ponto habebat, reliquas promiscis militum
commeatibus infirmaverat, donec adventare Vologesen
magno et infenso agmine auditum.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.