Click on a word to bring up parses, dictionary entries, and frequency statistics
56.
Verum et tibi valida aetas rebusque et fructui rerum
sufficiens, et nos prima imperii spatia ingredimur, nisi forte
aut te Vitellio ter consuli aut me Claudio postponis et
quantum Volusio longa parsimonia quaesivit, tantum in
te mea liberalitas explere non potest. quin, si qua in parte
lubricum adulescentiae nostrae declinat, revocas ornatumque
robur subsidio impensius regis? non tua moderatio, si
reddideris pecuniam, nec quies, si reliqueris principem, sed
mea avaritia, meae crudelitatis metus in ore omnium versabitur. quod si maxime continentia tua laudetur, non tamen
sapienti viro decorum fuerit unde amico infamiam paret
inde gloriam sibi recipere.' his adicit complexum et oscula,
factus natura et consuetudine exercitus velare odium fallacibus blanditiis. Seneca, qui finis omnium cum dominante
sermonum, grates agit: sed instituta prioris potentiae commutat, prohibet coetus salutantium, vitat comitantis, rarus per
urbem, quasi valetudine infensa aut sapientiae studiis domi
attineretur.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.