Click on a word to bring up parses, dictionary entries, and frequency statistics
49.
Libertas Thraseae servitium aliorum rupit et postquam discessionem consul permiserat, pedibus in sententiam
eius iere, paucis exceptis, in quibus adulatione promptissimus
fuit A. Vitellius, optimum quemque iurgio lacessens et
respondenti reticens, ut pavida ingenia solent. at consules
perficere decretum senatus non ausi de consensu scripsere
Caesari. ille inter pudorem et iram cunctatus, postremo rescripsit nulla iniuria provocatum Antistium gravissimas in
principem contumelias dixisse; earum ultionem a patribus
postulatam et pro magnitudine delicti poenam statui par
fuisse. ceterum se, qui severitatem decernentium impediturus fuerit, moderationem non prohibere: statuerent ut vellent, datam et absolvendi licentiam. his atque talibus
recitatis et offensione manifesta, non ideo aut consules
mutavere relationem aut Thrasea decessit sententia ceterive
quae probaverant deseruere, pars, ne principem obiecisse
invidiae viderentur, plures numero tuti, Thrasea sueta
firmitudine animi et ne gloria intercideret.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.