Click on a word to bring up parses, dictionary entries, and frequency statistics
4.
Placuit sollertia, tempore etiam iuta, quando Quinquatruum festos dies apud Baias frequentabat. illuc matrem
elicit, ferendas parentium iracundias et placandum animum
dictitans quo rumorem reconciliationis efficeret acciperetque Agrippina facili feminarum credulitate ad gaudia.
venientem dehinc obvius in litora (nam Antio adventabat)
excepit manu et complexu ducitque Baulos. id villae
nomen est quae promunturium Misenum inter et Baianum
lacum flexo mari adluitur. stabat inter alias navis ornatior,
tamquam id quoque honori matris daretur: quippe sueverat
triremi et classiariorum remigio vehi. ac tum invitata ad
epulas erat ut occultando facinori nox adhiberetur. satis
constitit extitisse proditorem et Agrippinam auditis insidiis,
an crederet ambiguam, gestamine sellae Baias pervectam.
ibi blandimentum sublevavit metum: comiter excepta
superque ipsum conlocata. iam pluribus sermonibus modo
familiaritate iuvenili Nero et rursus adductus, quasi seria
consociaret, tracto in longum convictu, prosequitur abeuntem, artius oculis et pectori haerens, sive explenda simulatione, seu periturae matris supremus aspectus quamvis
ferum animum retinebat.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.