Click on a word to bring up parses, dictionary entries, and frequency statistics
37.
At Tiridates super proprias clientelas ope Vologesi
fratris adiutus, non furtim iam sed palam bello infensare
Armeniam, quosque fidos nobis rebatur, depopulari, et si
copiae contra ducerentur, eludere hucque et illuc volitans
plura fama quam pugna exterrere. igitur Corbulo quaesito
diu proelio frustra habitus et exemplo hostium circumferre bellum coactus, dispertit viris ut legati praefectique
diversos locos pariter invaderent; simul regem Antiochum
monet proximas sibi praefecturas petere. nam Pharasmanes
interfecto filio Radamisto quasi proditore, quo fidem in nos
testaretur vetus adversus Armenios odium promptius exercebat. tuncque primum inlecti Moschi, gens ante alias socia
Romanis, avia Armeniae incursavit. ita consilia Tiridati
in contrarium vertebant, mittebatque oratores qui suo
Parthorumque nomine expostularent cur datis nuper obsidibus redintegrataque amicitia, quae novis quoque beneficiis
locum aperiret, vetere Armeniae possessione depelleretur.
ideo nondum ipsum Vologesen commotum, quia causa
quam vi agere mallent: sin perstaretur in bello, non defore
Arsacidis virtutem fortunamque saepius iam clade Romana
expertam. ad ea Corbulo, satis comperto Vologesen defectione Hyrcaniae attineri, suadet Tiridati precibus Caesarem
adgredi: posse illi regnum stabile et res incruentas contingere, si omissa spe longinqua et sera praesentem potioremque sequeretur.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.