Click on a word to bring up parses, dictionary entries, and frequency statistics
41.
Ti. Claudio quintum Servio Cornelio Orfito consulibus virilis toga Neroni maturata quo capessendae rei publicae habilis videretur. et Caesar adulationibus senatus
libens cessit ut vicesimo aetatis anno consulatum Nero
iniret atque interim designatus proconsulare imperium extra
urbem haberet ac princeps iuventutis appellaretur. additum nomine eius donativum militi, congiarium plebei. et
ludicro circensium, quod adquirendis vulgi studiis edebatur, Britannicus in praetexta, Nero triumphali veste travecti sunt: spectaret populus hunc decore imperatorio,
illum puerili habitu, ac perinde fortunam utriusque praesumeret. simul qui centurionum tribunorumque sortem
Britannici miserabantur, remoti fictis causis et alii per
speciem honoris; etiam libertorum si quis incorrupta fide,
depellitur tali occasione. obvii inter se Nero Britannicum
nomine, ille Domitium salutavere. quod ut discordiae initium Agrippina multo questu ad maritum defert: sperni
quippe adoptionem, quaeque censuerint patres, iusserit
populus, intra penatis abrogari; ac nisi pravitas tam infensa docentium arceatur, eruptura in publicam perniciem.
commotus his quasi criminibus optimum quemque educatorem filii exilio aut morte adficit datosque a noverca custodiae
eius imponit.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.