Click on a word to bring up parses, dictionary entries, and frequency statistics
35.
Obstupefecit ea alacritas ducem Romanum; simul
obiectus amnis, additum vallum, imminentia iuga, nihil nisi
atrox et propugnatoribus frequens terrebat. sed miles
proelium poscere, cuncta virtute expugnabilia clamitare;
praefectique et tribuni paria disserentes ardorem exercitus
intendebant. tum Ostorius, circumspectis quae impenetrabilia quaeque pervia, ducit infensos amnemque haud
difficulter evadit. ubi ventum ad aggerem, dum missilibus
certabatur, plus vulnerum in nos et pleraeque caedes oriebantur: postquam facta testudine rudes et informes saxorum compages distractae parque comminus acies, decedere
barbari in iuga montium. sed eo quoque inrupere ferentarius gravisque miles, illi telis adsultantes, hi conferto
gradu, turbatis contra Britannorum ordinibus, apud quos
nulla loricarum galearumve tegmina; et si auxiliaribus resisterent, gladiis ac pilis legionariorum, si huc verterent,
spathis et hastis auxiliarium sternebantur. clara ea victoria
fuit, captaque uxor et filia Carataci fratresque in deditionem
accepti.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.