Click on a word to bring up parses, dictionary entries, and frequency statistics
75.
Hic exitus viri haud sane spernendi. quinque et
triginta stipendia in re publica fecerat, domi militiaeque clarus. innocentiam iustitiamque eius non argueres; sermonis
nimius erat: id unum septem annis quibus Moesiam, duodecim quibus praefecturam urbis obtinuit, calumniatus est
rumor. in fine vitae alii segnem, multi moderatum et civium
sanguinis parcum credidere. quod inter omnis constiterit, ante
principatum Vespasiani decus domus penes Sabinum erat.
caedem eius laetam fuisse Muciano accepimus. ferebant plerique etiam paci consultum dirempta aemulatione inter duos,
quorum alter se fratrem imperatoris, alter consortem imperii
cogitaret. sed Vitellius consulis supplicium poscenti populo
restitit, placatus ac velut vicem reddens, quod interrogantibus quis Capitolium incendisset, se reum Atticus obtulerat
eaque confessione, sive aptum tempori mendacium fuit, invidiam crimenque agnovisse et a partibus Vitellii amolitus
videbatur.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.