Click on a word to bring up parses, dictionary entries, and frequency statistics
30.
Munientibus castra apud Ticinum de adversa Caecinae pugna adlatum, et prope renovata seditio tamquam
fraude et cunctationibus Valentis proelio defuissent: nolle
requiem, non expectare ducem, anteire signa, urgere signiferos; rapido agmine Caecinae iunguntur. improspera Valentis fama apud exercitum Caecinae erat: expositos se tanto
pauciores integris hostium viribus querebantur, simul in
suam excusationem et adventantium robur per adulationem
attollentes, ne ut victi et ignavi despectarentur. et quamquam plus virium, prope duplicatus legionum auxiliorumque
numerus erat Valenti, studia tamen militum in Caecinam inclinabant, super benignitatem animi, qua promptior habebatur, etiam vigore aetatis, proceritate corporis et quodam
inani favore. hinc aemulatio ducibus: Caecina ut foedum
ac maculosum, ille ut tumidum ac vanum inridebant. sed
condito odio eandem utilitatem fovere, crebris epistulis sine
respectu veniae probra Othoni obiectantes, cum duces partium Othonis quamvis uberrima conviciorum in Vitellium
materia abstinerent.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.