Click on a word to bring up parses, dictionary entries, and frequency statistics
10.
Oriens adhuc immotus. Syriam et quattuor legiones
obtinebat Licinius Mucianus, vir secundis adversisque iuxta
famosus. insignis amicitias iuvenis ambitiose coluerat; mox
attritis opibus, lubrico statu, suspecta etiam Claudii iracundia, in secretum Asiae sepositus tam prope ab exule fuit
quam postea a principe. luxuria industria, comitate adrogantia, malis bonisque artibus mixtus: nimiae voluptates, cum
vacaret; quotiens expedierat, magnae virtutes: palam laudares, secreta male audiebant: sed apud subiectos, apud pro-
ximos, apud collegas variis inlecebris potens, et cui expeditius fuerit tradere imperium quam obtinere. bellum Iudaicum Flavius Vespasianus (ducem eum Nero delegerat) tribus legionibus administrabat. nec Vespasiano adversus Galbam votum aut animus: quippe Titum filium ad venerationem
cultumque eius miserat, ut suo loco memorabimus. occulta
fati et ostentis ac responsis destinatum Vespasiano liberisque eius imperium post fortunam credidimus.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.