previous next

Click on a word to bring up parses, dictionary entries, and frequency statistics

Interea scelerum luctusque ignarus Iason
alta secat; neque enim patrios cognoscere casus
Iuno sinit, mediis ardens ne flectat ab undis
ac temere in Pelian et adhuc obstantia regis
5fata ruat placitosque deis ne1 deserat actus.

Iamque fretis2 summas aequatum Pelion ornos
templaque Tisaeae3 mergunt obliqua Dianae;
iam Sciathos subsedit aquis, iam longa recessit
Sepias; attollit tondentes pabula Magnes
10campus equos: vidisse putant Dolopeia busta
intrantemque Amyron4 curvas quaesita per oras
aequora, flumineo cuius redeuntia vento
vela legunt; remis insurgitur. inde salutant
Eurymenas; recipit velumque fretumque reversus5
15auster, et in nubem Minyis repetentibus6 altum
Ossa redit. metus ecce deum damnataque bello
Pallene, circumque vident immania monstra
terrigenum caelo quondam adversata gigantum,
quos scopulis trabibusque parens miserata iugisque
20induit et versos exstruxit in aethera montes.
[p. 32] quisque suas in rupe minas pugnamque metusque
servat adhuc; quatit ipse hiemes et torquet ab alto
fulmina crebra pater; scopulis sed maximus illis
horror abest, Sicula pressus tellure Typhoeus.
25hunc profugum et sacras revomentem pectore flammas,
ut memorant, prensum ipse comis Neptunus in altum7
abstulit implicuitque vadis totiensque cruenta
mole resurgentem torquentemque anguibus undas8
Sicanium dedit usque fretum cumque urbibus Aetnam9
30intulit ora premens. trux ille eiectat adesi10
fundamental iugi; pariter tune omnis11 anhelat
Trinacria, iniectam12 fesso dum pectore molem
commovet13 experiens gemituque reponit inani.

Iamque Hyperionius metas maris urget Hiberi
35currus et evectae prono laxantur habenae
aethere, cum palmas Tethys grandaeva sinusque
sustulit et rupto sonuit sacer aequore Titan.
auxerat14 hora metus, iam se vertentis Olympi
ut faciem raptosque simul montesque locosque
40ex oculis circumque graves videre tenebras.
ipsa quies rerum mundique silentia terrent
astraque et effusis stellatus crinibus aether.
ac velut ignota captus regione viarum
noctivagum qui carpit iter non aure quiescit,
45non oculis, noctisque metus niger auget utrimque15
campus et occurrens16 umbris maioribus arbor,17
haud aliter trepidare viri. sed pectora firmans
Hagniades 'non hanc' inquit 'sine numine18 pinum
derigimus,19 nec me tantum Tritonia cursus
[p. 33] 50erudiit; saepe ipsa manu dignata carinam est.
an20 non experti, subitus cum luce fugata
horruit imbre dies? quantis, pro Iuppiter, austris
restitimus, quanta quotiens et Palladis arte21
incassum decimae cecidit tumor arduus undae.
55quin agite, o socii; micat immutabile caelum
puraque nec gravido surrexit Cynthia cornu,
nullus in ore22 rubor, certusque ad talia Titan
integer in fluctus et in uno decidit auro.23

1 ne Heinsius, neu V

2 fretis C, freti V

3 Tisaeae Ald., pisaeae V

4 Amyron Maserius (Apoll. Rhod. I 596), myrin V, amyrin C

5 reversus Bon.1, reuerso V, reuersum C

6 repentibus V, corr. X2M2

7 altum S, altu V, alto C

8 undas SM, aindas V

9 dedit: cf. Stat. Theb. I 568 | aetnam M, aeternam V

10 adesi X2M, adesit V

11 omnis M, omnes V

12 iniectam OQ, iniecta V

13 Commovet Bon.1, Cū mouet V

14 Auxerat M, Auserat V

15 Non V, Au Par. | uetus Par. (metus correctum) | utrunque Par.

16 Corpus Par. | occurrit Par.

17 habet Par.

18 numine X1 corr., M. nomine V

19 Dirigimus OQ

20 an Balbus, At V

21 arte X2M, arta V

22 ore VCa, orbe Cb

23 auro Thomas Phaedrus (cf. Verg. Georg. I 458 sqq.), euro VC

Creative Commons License
This work is licensed under a Creative Commons Attribution-ShareAlike 3.0 United States License.

An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.

load focus Introduction (Otto Kramer, 1913)
load Vocabulary Tool
hide Display Preferences
Greek Display:
Arabic Display:
View by Default:
Browse Bar: