Mox taciti patuere doli nec vellera curae
65esse viro, sed sese odiis immania cogi
in freta. qua iussos sed tandem1 quaerere Colchos
arte queat? nunc aerii plantaria vellet
Perseos2 aut curru saevos frenasse dracones
ardet, ut3 ignaras Cereris qui vomere terras
70imbuit4 et flava quercum damnavit arista.
heu quid agat? populumne levem veterique tyranno
[p. 4]
infensum atque olim miserantes Aesona patres
advocet? an socia Iunone et Pallade fretus
armisona superet magis et freta iussa capessat,
75siqua operis tanti domito consurgere ponto
fama queat? tu sola animos mentesque peruris,
Gloria;5 te viridem videt immunemque senectae
Phasidis in ripa stantem6 iuvenesque vocantem.
tandem animi incertum7 confusaque pectora firmat
80relligio, tendensque pias ad sidera palmas
'omnipotens regina', inquit 'quam, turbidus atro
aethere8 caeruleum quateret cum Iuppiter imbrem,
ipse ego praecipiti tumidum per Enipea nimbo
in campos et tuta tuli nec credere quivi
85ante deam, quam te tonitru nutuque reposci
coniugis et subita raptam formidine vidi,
da Scythiam Phasimque mihi; tuque, innuba Pallas,
eripe me. vestris egomet tune vellera templis
illa dabo, dabit auratis et cornibus igni
90colla9 pater, niveique greges altaria cingent.'
Accepere10 deae celerique per aethera lapsu
diversas petiere vias. in moenia pernix
Thespia11 et ad carum Tritonia devolat Argum.
moliri hunc puppem iubet et demittere ferro
95robora, Peliacas et iam comes exit in umbras.12
at Iuno Argolicas pariter Macetumque13 per urbes
spargit inexpertos temptare parentibus austros
Aesoniden; iam stare ratem remisque superbam
poscere quos revehat rebusque in saecula tollat.
[p. 5]
100Omnis avet14 quae iam bellis spectataque fama
turba ducum, primae seu quos in flore iuventae
temptamenta tenent necdum data copia rerum:
at quibus arvorum studiumque insontis aratri,
hos stimulant magnaque ratem per lustra viasque
105visi15 laude canunt manifesto in lumine Fauni
silvarumque deae atque elatis cornibus Amnes.
Protinus Inachiis ultro Tirynthius Argis16
advolat, Arcadio cuius flammata veneno
tela puer facilesque umeris gaudentibus arcus
110gestat Hylas: velit ille quidem, sed dextera nondum
par oneri clavaeque capax. quos talibus amens
insequitur solitosque novat Saturnia questus:
'o utinam Graiae rueret17 non omne iuventae
in nova fata decus, nostrique Eurystheos haec nunc
115iussa forent. imbrem et tenebras saevumque tridentem
iam iam ego et inviti torsissem18 coniugis ignem.
nune quoque nec socium nostrae columenve carinae
esse velim, Herculeis nec me umquam fidere fas sit
auxiliis comiti et tantum debere superbo.'
This text is part of:
Search the Perseus Catalog for:
Click on a word to bring up parses, dictionary entries, and frequency statistics
1 sed tandem Caussin, sectantem VC | quaerere SV2, querire V1
2 Perseas V2
3 ardet, ut Sudhaus, Creditus V | Cereris qui Bon.2, cerere
needschecking s quo V
4 Imbuat V2 | damnabit V2
5 tu — Gloria habet Par. | mentesque Par., mentem- que V
6 stantem SM, stentem V
7 incaeptum Ca, incoeptum Cb
8 Aethere V, Aethera C | imbrem V2XO2, imbre V1C
9 Colla XM, Colca V | greges SV2, greces V1
10 Accepere de(a)e S, Accipere de V1, Accepere sede V2
11 Thespia et ad Kr., cf. 478, Thespiaca et V, Thespiaca ad C
12 umbras Sabellicus, undas VC
13 macedumque V2
14 auet C, cf. Thes. l. L. II p. 1313 sq., habet V, obit Schenkl | fama C Ald., forma V
15 visi Heinsius, iussi V
16 Argis Bon.1, agris V
17 rueret X2 supra lin. corr., grueret V
18 torsissem M, torrissem V
C. Valerius Flaccus. Otto Kramer. C. Valeri Flacci Setini Balbi Argonauticon Libri Octo. Leipzig. Teubner. 1913.
The Annenberg CPB/Project provided support for entering this text.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.