This text is part of:
Search the Perseus Catalog for:
[85]
"In Asiam cum a quaestore essem stipendio eductus,
hospitium Pergami accepi. Ubi cum libenter habitarem non solum propter cultum
aedicularum, sed etiam propter hospitis formosissimum filium, excogitavi rationem,
qua non essem patri familiae suspectus amator. Quotiescunque enim in convivio de usu
formosorum mentio facta est, tam vehementer excandui, tam severa tristitia violari
aures meas obsceno sermone nolui, ut me mater praecipue tanquam unum ex philosophis
intueretur. Iam ego coeperam ephebum in gymnasium deducere, ego studia eius
ordinare, ego docere ac praecipere, ne quis praedator corporis admitteretur in
domum. . .
Forte cum in triclinio iaceremus, quia dies sollemnis ludum artaverat pigritiamque
recedendi imposuerat hilaritas longior, fere circa mediam noctem intellexi puerum
vigilare. Itaque timidissimo murmure votum feci et 'domina' inquam 'Venus, si ego
hunc puerum basiavero, ita ut ille non sentiat, eras illi par columbarum donabo.'
Audito voluptatis pretio puer stertere coepit. Itaque aggressus simulantem aliquot
basiolis invasi. Contentus hoc principio bene mane surrexi electumque par columbarum
attuli expectanti [p. 171] ac me voto exsolvi.
Petronius Arbiter. Petronius. Michael Heseltine. London. William Heinemann. 1913.
The Annenberg CPB/Project provided support for entering this text.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.