Click on a word to bring up parses, dictionary entries, and frequency statistics
14. censoribus deinde creandis comitia edicta
sunt. petierunt censuram principes civitatis, C.
Valerius Laevinus, L. Postumius Albinus, P. Mucius
Scaevola, M.1 Iunius Brutus, C. Claudius Pulcher, T. Sempronius Gracchus. hos duos censores creavit
populus Romanus.
[2]
cum dilectus habendi maior
quam alias propter Macedonicum bellum cura esset,2 consules plebem apud senatum accusabant quod et3 iuniores non responderent.
[3]
adversus quos C. Sulpicius et M. Claudius praetores plebis causam
egerunt: non consulibus, sed ambitiosis consulibus
dilectum difficilem esse; neminem invitum militem
ab iis fieri.
[4]
id ut ita4 esse scirent et patres conscripti, praetores se,5 quibus vis imperii minor et auctoritas esset, dilectum, si ita senatui videretur, perfecturos esse.
[5]
id praetoribus magna patrum approbatione,6 non sine suggillatione consulum mandatum est. censores, ut eam rem adiuvarent, ita in contione edixerunt:7 legem censui censendo [p. 50] dicturos esse, ut praeter commune omnium civium8 ius iurandum haec adiurarent:
[6]
“tu minor annis sex et quadraginta es tuque9 ex edicto C. Claudi Ti. Semproni censorum ad dilectum prodisti10 et quotienscumque dilectus erit quoad11 hi censores magistratum habebunt, si miles factus non eris, in dilectum12 prodibis13 ?
[7]
” item, quia fama erat multos ex Macedonicis legionibus incertis commeatibus per ambitionem imperatorum ab exercitu abesse, edixerunt de militibus P. Aelio C. Popilio14 consulibus postve eos consules in Macedoniam scriptis,
[8?]
ut qui eorum in15 Italia essent intra dies triginta, censi16 prius apud sese, in provinciam redirent; qui in patris aut avi potestate essent, eorum nomina ad se ederentur.17
[9]
missorum quoque causas sese cognituros esse; et quorum ante emerita stipendia gratiosa missio sibi visa esset, eos milites fieri iussuros.
[10]
hoc edicto litterisque censorum per fora et conciliabula dimissis tanta multitudo iuniorum Romam convenit, ut gravis urbi turba insolita esset. [p. 52]
1 M. Sigonius: C. V.
2 Macedonicum bellum cura esset Fr: macedonicibellicuramesse V.
3 et del. edd., J. F. Gronovius sequentes; at, ut monuit Drakenborch, cf. XLII. xxxii. 5.
4 ita kreyssig: itaut V.
5 se Harant: et V: et post quibus posuit Fr.
6 approbatione add. kreyssig: om. V.
7 contione edixerunt Fr: contionem eduxerunt V.
8 A.U.C. 585
9 es tuque Fr: estusque V.
10 prodisti Madvig: proditi V: prodito Fr: prodibis Duker.
11 quoad Harant: quac V: quamdiu Weissenborn: cum Madvig post Ursinum: quando goldbacher.
12 delectum (sic) Sigonius: dilectu V.
13 prodibis Fr: providebis V.
14 C. Popilio add. Fr: om. V.
15 eorum in Fr: eorumquiin V.
16 censi Fr: cons. V.
17 nomina ad se ederentur Fr: nomine adsederentur V.
Livy. Books XLIII-XLV With An English Translation. Cambridge. Cambridge, Mass., Harvard University Press; London, William Heinemann, Ltd. 1951: published without copyright notice.
The Annenberg CPB/Project provided support for entering this text.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.