Titus Livius (Livy), The History of Rome, Book 38
Evan T. Sage, Ph.D., Ed.

54. morte Africani crevere inimicorum animi, quorum princeps fuit M. Porcius Cato, qui vivo quoque eo adlatrare¹ magnitudinem eius solitus erat. [2] hoc auctore existimantur Petillii et vivo Africano rem ingressi et mortuo rogationem promulgasse. [3] fuit autem rogatio talis: “velitis iubeatis, Quirites,² [p. 188] quae pecunia capta ablata coacta ab rege Antiocho³ est quique sub imperio eius fuerunt, quod eius in publicum relatum non est, [4?] uti de ea re Ser. Sulpicius praetor urbanus ad senatum referat quem eam rem velit senatus quaerere de iis qui praetores nunc sunt?” [5] huic rogationi primo Q. et L. Mummii⁴ intercedebant, senatum quaerere de pecunia non relata in publicum, ita ut antea semper factum esset, aequum censebant. [6] Petillii nobilitatem et regnum in senatu Scipionum accusabant. L. Furius Purpurio consularis, [7?] qui in decem legatis in Asia fuerat, latius rogandum censebat, non quae ab Antiocho modo pecuniae captae forent, sed quae ab aliis regibus gentibusque, Cn. Manlium inimicum incessens. [8] et L. Scipio, quem magis pro se quam adversus legem dicturum apparebat, dissuasor processit. is morte P. Africani fratris, viri omnium fortissimi clarissimique, eam exortam rogationem est conquestus; [p. 190] [9?] parum enim fuisse non laudari pro Rostris P.⁵ Africanum post mortem, nisi etiam accusaretur; [10] et Carthaginienses exilio Hannibalis contentos esse, populum Romanum ne morte quidem P. Scipionis exsatiari, nisi et ipsius fama sepulti laceretur et frater insuper, accessio invidiae, mactetur. [11] M. Cato suasit rogationem—exstat et oratio eius de pecunia regis Antiochi—et Mummios tribunos auctoritate deterruit ne adversarentur rogationi. [12] remittentibus ergo his intercessionem omnes tribus uti rogassent iusserunt.