Click on a word to bring up parses, dictionary entries, and frequency statistics
39. per eosdem dies M. Fulvius Nobilior ex
ulteriore Hispania ovans urbem est ingressus.
[2]
argenti transtulit duodecim milia pondo, bigati
argenti centum triginta, auri centum viginti septem
pondo.
[3]
P. Cornelius consul obsidibus a Boiorum gente
acceptis agri parte fere dimidia eos multavit, quo si
vellet, populus Romanus colonias mittere posset.
[4]
inde Romam ut ad triumphum haud dubium decedens exercitum dimisit, et adesse Romae ad diem
triumphi iussit;
[5]
ipse postero die quam venit senatu
in aedem Bellonae vocato cum de rebus ab se gestis
disseruisset, postulavit ut sibi triumphanti liceret
urbem invehi.
[6]
P. Sempronius Blaesus tribunus
plebis non negandum Scipioni, sed differendum
honorem triumphi censebat: bella Ligurum Gallicis
semper iuncta fuisse; eas inter se gentes mutua ex
propinquo ferre auxilia.
[7]
si P. Scipio devictis1 acie
[p. 268]
Bois aut ipse cum victore exercitu in agrum Ligurum2 transisset, aut partem copiarum Q. Minucio misisset, qui iam tertium ibi annum dubio detineretur bello,
debellari cum Liguribus potuisse;
[8]
nunc ad triumphum frequentandum deductos esse milites, qui egregiam navare operam rei publicae potuissent, possent
etiam, si senatus, quod festinatione triumphi praetermissum esset, id restituere differendo triumpho vellet.
[9]
iuberent consulem cum legionibus redire in provinciam, dare operam, ut Ligures subigantur. nisi illi
cogantur in ius iudiciumque populi Romani, ne Boios
quidem quieturos; aut pacem aut bellum utrobique
habenda.
[10]
devictis Liguribus, paucos post menses
proconsulem P. Cornelium multorum exemplo, qui in
magistratu non triumphaverunt, triumphaturum esse.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.