Titus Livius (Livy), The History of Rome, Book 33
Evan T. Sage, Ph.D. Professor of Latin and Head of the Department of Classics in the University of Pittsburgh, Ed.

34. secundum Isthmia Quinctius et decem legati legationes regum gentiumque audivere. [2] primi omnium regis Antiochi vocati legati sunt. iis eadem [p. 368] fere quae Romae egerant verba sine fide rerum iactantibus¹ nihil iam perplexe, [3?] ut ante, cum dubiae res incolumi Philippo erant, sed aperte denuntiatum, ut excederet Asiae urbibus, quae Philippi aut Ptolomaei regum fuissent, abstineret liberis civitatibus, neu quam² lacesseret armis: et in pace et in libertate esse debere omnes ubique Graecas urbes. [4] ante omnia denuntiatum ne in Europam aut ipse transiret aut copias traiceret. [5] dimissis regis legatis conventus civitatum gentiumque est haberi coeptus; eoque maturius peragebatur, quod decreta decem legatorum in civitates³ nominatim pronuntiabantur. [6] Orestis— Macedonum ea gens est—quod primi ab rege defecissent, suae leges redditae. magnetes et Perrhaebi et Dolopes liberi quoque pronuntiati. [7] Thessalorum genti praeter libertatem concessam Achaei Phthiotae dati, Thebis Phthioticis et Pharsalo excepta. Aetolos de Pharsalo et Leucade postulantes ut ex foedere sibi restituerentur ad senatum reiecerunt. [8] Phocenses Locrensesque, sicut ante fuerant, adiecta decreti auctoritate iis contribuerunt. [9] Corinthus et Triphylia et Heraea—Peloponnesi et ipsa urbs est—reddita Achaeis. [10] Oreum et Eretriam decem legati Eumeni regi, Attali filio, dabant dissentiente Quinctio; ea una res in arbitrium senatus reiecta est; senatus libertatem his civitatibus dedit Carysto adiecta. [p. 370] pleurato Lychnidus et Parthini dati; [11] Illyriorum⁴ utraque gens sub dicione Philippi fuerant. Amynandrum tenere iusserunt castella quae per belli tempus Philippo capta ademisset.