Titus Livius (Livy), The History of Rome, Book 3
Benjamin Oliver Foster, Ph.D., Ed.

35. postquam vero comitia decemviris creandis in trinum nundinum indicta sunt, [2?] tanta exarsit [p. 114] ambitio ut primores quoque civitatis—metu, credo, ne¹ tanti possessio imperii vacuo ab se relicto loco haud satis dignis pateret—prensarent homines, honorem summa ope a se impugnatum ab ea plebe cum qua contenderant² suppliciter petentes. [3] demissa³ iam in discrimen dignitas ea aetate iisque honoribus actis stimulabat Ap. Claudium. nescires utrum inter decemviros an inter candidatos numerares. [4] propior interdum petendo quam gerendo magistratui erat. criminari optimates, extollere candidatorum levissimum quemque humillimumque, ipse medius inter tribunicios, [5?] duillios⁴ Iciliosque,⁵ in foro volitare, per illos se plebi venditare, donec collegae quoque, qui unice illi dediti fuerant ad id tempus, coniecere in eum oculos, mirantes quid sibi vellet: [6] apparere nihil sinceri esse; profecto haud gratuitam in tanta superbia comitatem fore: nimium in ordinem se ipsum cogere et volgari cum privatis non tam properantis abire magistratu quam viam ad continuandum magistratum quaerentis esse. [7] propalam obviam ire cupiditati parum ausi obsecundando mollire impetum adgrediuntur. comitiorum illi habendorum, quando minimus natu sit, munus consensu iniungunt. [8] ars haec erat, ne semet ipse creare posset, quod praeter tribunos plebi—et id ipsum pessimo exemplo—nemo [p. 116] unquam fecisset. ille enimvero, quod bene vertat,⁶ habiturum se comitia professus, [9?] impedimentum pro occasione arripuit, deiectisque honore per coitionem⁷ duobus Quinctiis, Capitolino et Cincinnato, et patruo suo C. Claudio, constantissimo viro in optimatium causa, et aliis eiusdem fastigii civibus, nequaquam splendore vitae pares decemviros creat, [10?] se in primis, quod haud secus factum improbabant boni quam nemo facere ausurum crediderat. [11] creati cum eo M. Cornelius Maluginensis M. Sergius L. Minucius Q. Fabius Vibulanus Q. Poetelius⁸ T. Antonius Merenda K. Duillius⁹ Sp. Oppius Cornicen M'. Rabuleius.